World Cup પહેલાં માઠા સમાચાર, T20 માં 3 શતક ઠોંકી ચુકેલાં ખેલાડીએ ક્રિકેટને કર્યું અલવિદા

T20 World Cup 2024: હાલ આઈપીએલ ચાલી રહી છે. આઈપીએલ એના રોમાંચની ચરમસીમા પર પહોંચી ચુકી છે. આઈપીએલ બાદ અમેરિકા અને વેસ્ટઈન્ડિઝમાં સંયુક્ત રીતે ટી-20 ક્રિકેટ વર્લ્ડ કપ રમાનાર છે. ક્રિકેટના આ ફોર્મેટમાં ઓછા બોલમાં વધારે રન બનાવનાર ખેલાડીઓની ડિમાન્ડ છે. એવામાં એક એવા ખેલાડીએ ક્રિકેટને અલવિદા કહી દીધું છે જે ટી-20 ફોર્મેટમાં અત્યાર સુધી 3 શતક લગાવી ચુક્યો છે.આ ખેલાડીના સન્યાસથી તેના લાખો ક્રિકેટ ચાહકો નિરાશ થયા છે.

T20 ઈન્ટરનેશનલમાં 3-3 સદી ફટકારનાર ખેલાડીએ ક્રિકેટને કર્યું અલવિદાઃ
ક્રિકેટ ચાહકોને લાગ્યો મોટો આંચકો, વર્લ્ડ કપ શરૂ થતા પહેલાં જ વિસ્ફોટક બેટ્સમેને અચાનક કરી કરી દીધી સંન્યાસની જાહેરાત. આ એવો ખેલાડી છે જે આંતરરાષ્ટ્રિય ક્રિકેટમાં T20 ક્રિકેટમાં 3-3 સદી ફટકારી ચુક્યો છે. સ્ટ્રાઈક રેટની વાત કરીએ તો દર એક બોલમાં આ ખેલાડી બે થી ત્રણ લેવાની ક્ષમતા ધરાવે ચે. અર્થાત આ ખેલાડી ગ્રાઉન્ડમાં બેટિંગ કરવા ઉતરે ત્યારે ચોગ્ગા-છગ્ગાની વણઝાર લગાવી દે છે. આવા ખેલાડીના સન્યાસથી ક્રિકેટ ચાહકોને મોટો આંચકો લાગ્યો છે.

ન્યૂઝીલેન્ડનો ધુઆંધાર ખેલાડીઃ
અહીં વાત થઈ રહી છે  ન્યૂઝીલેન્ડ ક્રિકેટ ટીમના ધુઆંધાર બેટ્સમેન કોલિન મુનરોની. ન્યુઝીલેન્ડના વિસ્ફોટક બેટ્સમેન કોલિન મુનરોએ તેના ચાહકોને મોટો આંચકો આપ્યો છે. 37 વર્ષની ઉંમરે આ ખતરનાક બેટ્સમેને આંતરરાષ્ટ્રીય ક્રિકેટમાંથી નિવૃત્તિ લેવાની જાહેરાત કરી છે. T20 ઇન્ટરનેશનલમાં ત્રણ સદી ફટકારનાર આ ખતરનાક બેટ્સમેને તાત્કાલિક અસરથી આંતરરાષ્ટ્રીય ક્રિકેટને અલવિદા કહી દીધું છે.

કોલિન મુનરોની ક્રિકેટ કરિયરઃ
કોલિન મુનરોએ છેલ્લા 4 વર્ષથી ન્યૂઝીલેન્ડ માટે એક પણ આંતરરાષ્ટ્રીય મેચ રમી નથી. લાંબા સમય સુધી ટીમની બહાર રાખવામાં આવ્યા બાદ આ બેટ્સમેને આખરે પોતાની કારકિર્દીને લઈને મોટો નિર્ણય લીધો છે. કોલિન મુનરોએ ન્યુઝીલેન્ડ માટે તેની છેલ્લી આંતરરાષ્ટ્રીય મેચ 2 ફેબ્રુઆરી 2020 ના રોજ બે ઓવલ ખાતે ભારત સામે રમી હતી. કોલિન મુનરોએ ન્યૂઝીલેન્ડ માટે 1 ટેસ્ટ, 57 ODI અને 65 T20 આંતરરાષ્ટ્રીય મેચ રમી છે.

વિસ્ફોટક બેટ્સમેને અચાનક નિવૃત્તિની જાહેરાત કરી:
કોલિન મુનરોએ ન્યૂઝીલેન્ડ માટે 57 ODI મેચોમાં 24.92ની એવરેજથી 1271 રન બનાવ્યા છે, જેમાં 8 અડધી સદીનો સમાવેશ થાય છે. આ દરમિયાન તેનો સર્વશ્રેષ્ઠ સ્કોર 87 રન હતો. કોલિન મુનરોના નામે ODIમાં 7 વિકેટ છે અને તેનું સર્વશ્રેષ્ઠ પ્રદર્શન 10 રનમાં 2 વિકેટ રહ્યું છે. કોલિન મુનરોએ ન્યૂઝીલેન્ડ માટે 65 T20 આંતરરાષ્ટ્રીય મેચોમાં 31.35ની સરેરાશથી 1724 રન બનાવ્યા છે, જેમાં 3 સદી અને 11 અડધી સદી સામેલ છે. આ દરમિયાન તેનો સર્વશ્રેષ્ઠ સ્કોર 109 રન હતો. કોલિન મુનરોના નામે T20 ઈન્ટરનેશનલમાં 4 વિકેટ છે અને તેનું સર્વશ્રેષ્ઠ પ્રદર્શન 12 રનમાં 1 વિકેટ રહ્યું છે. કોલિન મુનરોએ ન્યૂઝીલેન્ડ માટે 1 ટેસ્ટ મેચમાં 15 રન બનાવ્યા છે. 1 ટેસ્ટ મેચમાં 2 વિકેટ લેવાનો રેકોર્ડ કોલિન મુનરોના નામે છે અને તેનું સર્વશ્રેષ્ઠ પ્રદર્શન 40 રનમાં 2 વિકેટ રહ્યું છે.

2014 અને 2016 T20 વર્લ્ડ કપમાં કરી ચુક્યો છે પ્રદર્શનઃ
કોલિન મુનરો ન્યૂઝીલેન્ડનો એકમાત્ર એવો બેટ્સમેન છે જેણે T20 ઈન્ટરનેશનલમાં ત્રણ સદી ફટકારી છે. કોલિન મુનરો 2014 અને 2016 T20 વર્લ્ડ કપમાં ન્યૂઝીલેન્ડ ટીમનો ભાગ હતો. કોલિન મુનરો ન્યુઝીલેન્ડની ટીમનો પણ એક ભાગ હતો જેણે 2019 વર્લ્ડ કપમાં રનર-અપ રહી હતી. કોલિન મુનરો પણ આઈપીએલમાં રમી ચૂક્યો છે. કોલિન મુનરોએ IPLની 13 મેચોમાં 14.75ની એવરેજથી 177 રન બનાવ્યા હતા. આ દરમિયાન તેનો સર્વશ્રેષ્ઠ સ્કોર 40 રન હતો. કોલિન મુનરો આઈપીએલમાં કોલકાતા નાઈટ રાઈડર્સ અને દિલ્હી કેપિટલ્સ તરફથી રમી ચૂક્યો છે. 37 વર્ષીય કોલિન મુનરોએ કહ્યું, 'બ્લેકકેપ્સ માટે રમવું એ હંમેશા મારી કારકિર્દીની સૌથી મોટી ઉપલબ્ધિ રહી છે. મેં ન્યૂઝીલેન્ડની જર્સી પહેરવા કરતાં વધુ ગર્વ અનુભવ્યો નથી. આ એવી વસ્તુ છે જેના પર મને હંમેશા ગર્વ રહેશે. T20 વર્લ્ડ કપ 2024 માટે બ્લેકકેપ્સ ટીમની જાહેરાત સાથે, હવે તે પ્રકરણને સત્તાવાર રીતે બંધ કરવાનો યોગ્ય સમય છે.